25 ఏళ్ల తర్వాత 9/11 దాడుల కేసులో కీలక మలుపు.. వెలుగులోకి కొత్త వీడియోలు

అమెరికాలో 2001 సెప్టెంబర్ 11న జరిగిన ఉగ్రదాడుల కేసులో సంచలన వీడియోలు వెలుగులోకి వచ్చాయి. ఈ దాడులతో సంబంధం ఉందని ఆరోపణలు ఎదుర్కొంటున్న సౌదీ జాతీయుడు ఒమర్ అల్-బయూమీ, అల్-ఖైదా అగ్రనేతగా మారిన అన్వర్ అల్-అవలాకితో సన్నిహితంగా ఉన్నట్టు ఈ వీడియోలు చూపిస్తున్నాయి. ‘బీబీసీ’ సంపాదించిన ఈ ఫుటేజ్, దాడుల్లో సౌదీ అరేబియా పాత్ర ఉందని ఆరోపిస్తూ బాధితుల కుటుంబాలు దాఖలు చేసిన కేసులో కీలక ఆధారంగా మారింది.

1997-98 మధ్య శాన్ డియాగో సమీపంలో చిత్రీకరించిన ఈ వీడియోలలో ఒమర్ అల్-బయూమీ, అన్వర్ అల్-అవలాకి, సౌదీ ఇస్లామిక్ వ్యవహారాల మంత్రిత్వ శాఖకు చెందిన ఒక అధికారితో కలిసి సైనిక తరహాలో పెయింట్‌బాల్ ఆడటం కనిపించింది. వారు ‘అల్లాహు అక్బర్’ అని నినదిస్తూ ముందుకు సాగడం రికార్డయింది. మరో వీడియోలో బయూమీ, అవలాకిని ఆలింగనం చేసుకోవడం స్పష్టంగా ఉంది. 9/11 దాడులకు పాల్పడిన ఇద్దరు హైజాకర్లకు కాలిఫోర్నియాలో నివాసం, బ్యాంకు ఖాతా వంటి సౌకర్యాలు కల్పించింది బయూమీనే.

ఆశ్చర్యకరంగా, ఈ వీడియో ఫుటేజ్ 9/11 దాడులు జరిగిన కొన్ని రోజులకే ఎఫ్‌బీఐ చేతికి చిక్కింది. దాడుల తర్వాత బ్రిటన్‌లో బయూమీని అరెస్ట్ చేసినప్పుడు అతడి వద్ద ఈ వీడియోలతో పాటు విమానం ల్యాండింగ్‌కు సంబంధించిన రేఖాచిత్రాలు కూడా దొరికాయి. అయితే, అతడిని కొన్ని రోజులకే విడుదల చేయగా, సౌదీ అరేబియాకు తిరిగి వెళ్లిపోయాడు. తాను అవలాకిని కలవలేదని గతంలో బయూమీ చెప్పిన మాటలు ఈ వీడియోలతో అబద్ధమని తేలింది.

యెమెన్-అమెరికన్ అయిన అవలాకి, ఆ తర్వాత అరేబియన్ ద్వీపకల్పంలో అల్-ఖైదా సీనియర్ నేతగా ఎదిగాడు. 2011లో అమెరికా జరిపిన డ్రోన్ దాడిలో హతమయ్యాడు. సౌదీ పాత్రపై 9/11 బాధితుల కుటుంబాలు దాఖలు చేసిన ట్రిలియన్ డాలర్ల దావాలో ఈ వీడియోలను తాజాగా కోర్టు ముందుంచారు. ఇన్నేళ్లపాటు ఇంతటి కీలక ఆధారాలున్నా ఎఫ్‌బీఐ ఎందుకు లోతుగా దర్యాప్తు చేయలేదనే ప్రశ్నలు ఇప్పుడు మళ్లీ తలెత్తుతున్నాయి. సౌదీ ప్రభుత్వం మాత్రం ఈ దాడులతో తమకు ఎలాంటి సంబంధం లేదని మొదటి నుంచి చెబుతూ వస్తోంది.